அணிந்துரை

ஹதீஸ் நூல் தொகுப்பு வரலாற்றில் ஸாலிஹ் பின் அஹ்மத் அல்ஷாமி அவர்களின் 'மஆலிம் அஸ்ஸுன்னஹ் அந்நபவிய்யா' என்ற இத்தொகுப்பு நூல் ஒரு புதிய அத்தியாயம் படைத்துள்ளது. இந்நூலின் மூலாதாரங்களாக விளங்கும் 14 நூல்களைத் தொகுப்பாசிரியர் மீளாய்வுக்கு எடுத்துக் கொண்டுள்ளார். அவர் அவற்றிலுள்ள எல்லா ஹதீஸ்களையும் ஒன்று திரட்டி ஆய்வு செய்து, பலமுறை பதிவு செய்யப்பட்ட ஹதீஸ்களை ஒரே பதிவாகத் தேர்வு செய்து புதிய தொகுப்பாக இந்நூலில் வழங்கியுள்ளார். இதனால் 14 தொகுப்புகளில் உள்ள ஹதீஸ்களுள் ஒன்றுகூட விடுபடாமல் இந்த ஒரே தொகுப்பில் அடங்கியுள்ளன.

இந்த அரிய நூலைத் தமிழாக்கம் செய்யும் பெரும் பணியை அன்பு நண்பர் மௌலானா முனைவர் நூ. அப்துல் ஹாதி பாகவி ஏற்றுள்ளார். அவர் ஏற்கெனவே பல அரபு நூல்களைத் தமிழாக்கம் செய்திருப்பதால் மொழிபெயர்ப்புப் பணி அவருக்குக் கைதேர்ந்த கலை. அதிலும் குறிப்பாக, சுனன் நஸாயி, இப்னு மாஜா போன்ற ஹதீஸ் தொகுப்புகளை அவர் ஏற்கெனவே தமிழாக்கம் செய்திருப்பதன் பயனாக அவரின் மொழிபெயர்ப்பு முதிர்ச்சியை இந்நூலில் தெளிவாகக் காண முடிகிறது.

இறுதித் தூதர் முஹம்மது ஸல்லல்லாஹு அலைஹி வஸல்லம் அவர்களின் வாழ்க்கை நடைமுறை (சுன்னா) மனித குலத்துக்கு ஒரு முழுமையான வழிகாட்டும் நெறிமுறையாக விளங்குகிறது. அது எல்லாக் காலத்துக்கும், எல்லாச் சூழ்நிலைக்கும் மிக உகந்தது. மனிதன் பிறப்பு முதல் இறப்பு வரை மட்டுமல்லாது தாயின் வயிற்றில் கருவுற்றது முதல் இறப்புக்குப் பின் வாழ்க்கை வரையிலும் அது வழிகாட்டுகிறது. தனி மனித வாழ்க்கை, குடும்ப வாழ்க்கை, சமூக வாழ்க்கை, ஆன்மிகம், அரசியல், பொருளாதாரம், உடல், ஆன்மா ஆகிய அனைத்து அம்சங்களுக்கும் உன்னத முன்மாதிரியாக நபியின் வாழ்வியல் விளங்குகிறது.

அது நடுநிலையான வாழ்க்கைக்கு வழிகாட்டுவதோடு, மக்கள் அன்றாட நடைமுறை வாழ்வில் பின்பற்றி வாழ்வதற்கும் மிக எளிமையானதாக விளங்குகிறது. இது நபிவழியின் தனிச்சிறப்புகளுள் ஒன்றாகும். இக்கருத்தை திருக்குர்ஆன் பல இடங்களில் தெளிவாகக் கூறுகிறது.

நபிகளாரிடமிருந்து ஹதீஸ்களைக் கற்ற நபித்தோழர்கள், நபியவர்களின் மறைவுக்குப் பின்பு பல ஊர்களுக்குப் பிரிந்து சென்றனர். அவர்கள் அவற்றை அடுத்த தலைமுறையினருக்குப் போதித்து வந்தனர். இவ்வாறாக, இரண்டு அல்லது மூன்று தலைமுறை வரை ஹதீஸ்கள் வாய் மொழியாகவே அறிவிக்கப்பட்டு வந்தன. இதற்கு

விதிவிலக்காக ஹதீஸ்கள் சிறு சிறு தொகுப்புகளாக ஆங்காங்கு ஆரம்பக் காலம் முதலிலே எழுதி வைக்கப்பட்டிருந்ததாகவும் வரலாற்றுப் பதிவுகள் உறுதி செய்கின்றன.

ஹிஜ்ரி முதலாம் நூற்றாண்டின் இறுதிக் கட்டத்தில் ஹதீஸ்களை முறையாகத் தொகுக்கும் பணி தொடங்கியபோது ஹதீஸ் வல்லுநர்கள் ஊர் ஊராகச் சென்று அறிவிப்பாளர்களை நேரில் சந்தித்து அவர்களின் அறிவிப்பின் நம்பகத்தன்மையை உறுதி செய்த பின்புதான் அவற்றைப் பதிவு செய்தனர்.

நபித்தோழர் ஒருவர் அறிவித்த ஒரு ஹதீஸை பலர் கேட்டிருக்கலாம். அவர்கள் ஒவ்வொருவரும் அடுத்த தலைமுறையினருக்கு அதனை அறிவித்திருக்கலாம். இவ்வாறு ஒரே ஒரு ஹதீஸ் பற்பல அறிவிப்பாளர் வழியாக நமக்கு வந்துசேர்ந்திருக்கலாம்.

ஆகவே ஒவ்வொரு ஹதீஸின் ஒவ்வோர் அறிவிப்பாளர் தொடர் சங்கிலியை ஆரம்பம் முதல் கடைசி வரை துல்லியமாக ஹதீஸ் வல்லுநர்கள் ஆவணப்படுத்தியுள்ளார்கள்.

இந்த அறிவிப்பாளர் சங்கிலித் தொடர் 'இஸ்னாத்' என்று அரபியில் குறிப்பிடப்படுகிறது. அதிலும் குறிப்பாக, ஒவ்வோர் இஸ்னாதையும் ஒவ்வொரு ஹதீஸாகவே ஆய்வாளர்கள் ஆவணப்படுத்தியிருக்கிறார்கள். இதனால்தான் ஒரே ஹதீஸ் பல தடவைகள் மீண்டும் மீண்டும் பதிவு செய்யப்பட்டிருப்பதை நம்மால் காண முடிகிறது.

ஹதீஸ்களைக் கணக்கிடும் முறைகள்:

ஹதீஸ்களைக் கணக்கிடுவதற்கு மூன்று வழிமுறைகள் உள்ளன.

1. இஸ்னாதை அறிவிப்பாளர் தொடரை அடிப்படையாக வைத்துக் கணக்கிடுதல். உதாரணமாக ஒரு ஹதீஸை 10 ஸஹாபாக்கள் அறிவித்திருந்தால் அது 10 ஹதீஸ்களாகப் பதிவு செய்யப்படும். அவர்களுள் வ்வொருவரிடமிருந்தும் மூவர் செவிமடுத்து தத்தம் மாணவர்கள் வழியாக அறிவித்திருந்தால் அவை மொத்தம் 30 இஸ்னாதுகள். ஆகவே அவை 30 ஹதீஸ்களாகக் கணக்கிடப்படுகின்றன.
2. அறிவிக்கும் ஸஹாபியை அடிப்படையாக வைத்துக் கணக்கிடுதல். உதாரணமாக, ஒரே ஹதீஸை 10 ஸஹாபாக்கள் அறிவித்திருந்தால் அது 10 பதில்கள். அவற்றை 10 ஹதீஸ்களாகவே கணக்கிடப்படும்; அது எத்தனை தொடர் வழியாக அறிவிக்கப்பட்டிருந்தாலும் சரியே.
3. ஹதீஸ் உரையை அடிப்படையாக எடுத்துக்கொண்டு கணக்கிடுதல்: உதாரணமாக ஒரு ஹதீஸை எத்தனை நபித்தோழர்கள் அறிவித்திருந்தாலும் அல்லது அது எத்தனை அறிவிப்பாளர்தொடர் வழியாக அறிவிக்கப்பட்டிருந்தாலும் அது ஒரு ஹதீஸாகவே கணக்கிடப்படும்.

நூல் ஆசிரியரின் கணக்கீடு:

மேற்கூறிய மூன்று கணக்கீட்டின்படி ஹதீஸ்களின் மொத்த எண்ணிக்கையை நூலாசிரியர் கீழ்க்கண்டவாறு கணக்கிடுகிறார்:

• முதல் கணக்கீட்டின்படி 14 மூலாதார ஹதீஸ் தொகுப்புகளில் பதிவு செய்யப்பட்ட மொத்த ஹதீஸ்களின் எண்ணிக்கை: 1,14,194.
• இரண்டாவது கணக்கீட்டின்படி மொத்த ஹதீஸ்களின் எண்ணிக்கை 28,430.
• மூன்றாவது கணக்கீட்டின்படியே நூல் ஆசிரியர் அல்ஜாமீ இன்நூலாஸைத் தொகுத்திருக்கிறார். இருப்பினும் அவருடைய கணக்கீடு இன்னும் மிகத் துல்லியமான பல அம்சங்களை உள்ளடக்கியுள்ளது. அவற்றுள் சில:

ஒரு ஹதீஸைப் பலர் அறிவிக்கும்போது அதன் சொற்கள் வித்தியாசமாக இருந்தால் அவற்றில் ஒன்றை மட்டும் தேர்வு செய்து, அதனை ஒரு ஹதீஸாகவே நூலாசிரியர் கணக்கிடுகிறார்.

நபி ஸல்லல்லாஹு அலைஹி வஸல்லம் அவர்களின் சொல் அல்லாத நபித்தோழர்களின் உரைகளைக் குறைந்த அளவிலேயே நூலாசிரியர் இந்நூலில் பதிவு செய்திருக்கிறார்.

இந்த அடிப்படையில் மொத்த ஹதீஸ்களின் எண்ணிக்கை 3,921 என்று நூலாசிரியர் முடிவு செய்கிறார். இதனையே, இந்நூலில் தொகுத்து வழங்கியுள்ளார். இந்த வகையில் இந்நூல் ஹதீஸ் தொகுப்பு வரலாற்றில் ஒரு புதிய அத்தியாயமாக விளங்குகிறது. இதனைத் தமிழாக்கி தமிழ்கூறு நல்லுலகிற்கு வழங்குவது சாலச்சிறந்த பணியாகும்.

மொழிபெயர்ப்பாளர் முனைவர் மௌலானா நூ. அப்துல் ஹாதி பாகவி அவர்களுக்கும் இந்நூலைப் பதிப்பித்து வெளியிடும் அப்துல்லாஹ் பப்ளிகேஷன்ஸ் நிர்வாகிகளுக்கும் எனது மனமார்ந்த வாழ்த்துகள். எல்லாம் வல்ல அல்லாஹ் அவர்களின் சேவையை ஏற்றுக்கொள்வானாக! இந்நூல் வழியாக நம் மக்களுக்கு நல்வழி காட்டுவானாக. ஆமீன்!

ஸஹீஹ், ளயீஃப் என்ற இரண்டு சொற்கள் பரவலாக முஸ்லிம்கள் அதிகம் பயன்படுத்தி, பயன்படுத்தி வருகின்ற சொற்களாக இருக்கின்றன. ஸஹீஹ் என்றால் ஆதாரப்பூர்வமான நபிமொழி. இதை மட்டுமே பின்பற்ற வேண்டும். இதுவே நம்மைச் சொர்க்கத்தில் கொண்டு சேர்க்கும். ளயீஃப் என்றால் ஆதாரப்பூர்வமற்ற நபிமொழி. இதைப் பின்பற்றக் கூடாது. ஏனெனில் இது நம்மை நரகத்தில் கொண்டு சேர்க்கும். இப்படியொரு தட்டையான புரிதல் முஸ்லிம்கள் மத்தியில் இருந்துவருகிறது.

ஆண்டாண்டு காலமாக இஸ்லாமிய அறிவுத்துறையில் ஆழமான அலசலுக்கும் விசாலமான விவாதத்திற்கும் உள்ளாக்கப்பட்ட ஒரு விஷயத்தைத் தட்டையான புரிதலுக்கு மட்டுமே தயாராக இருக்கின்ற பொதுமக்களிடம் கொண்டு சென்றதன் விளைவே இது.

உண்மையில் ஸயீஃபான எல்லா ஹதீஸ்களும் ஒரே தரமானவையா? ஸஹீஹான எல்லா ஹதீஸ்களும் ஒரே தரமானவையா? இல்லை என்பதுதான் இவ்விரண்டு கேள்விகளுக்கான பதில்.

இமாம் இப்னு ஹிப்பான் ரஹிமஹுல்லாஹ் அவர்கள் ஸயீஃபான ஹதீஸ்கள் நாற்பத்து ஒன்பது வகைகள் உள்ளன என்று கூறியுள்ளார்கள்.

ஸயீஃபான எல்லா ஹதீஸ்களும் விடப்பட வேண்டியவைதாடு; பின்பற்றத்தக்கவையல்ல என்றால் அவை அனைத்தும் 'புறக்கணிக்கப்பட வேண்டியவை' என்ற ஒரே வகைக்குள்ளேயே அடங்கிவிடும். நாற்பத்து ஒன்பது வகைகள் உள்ளன என்பதிலிருந்து ஒவ்வொரு வகை ஸயீஃபுக்கும் ஒவ்வொரு வகையான சட்ட அந்தஸ்து வழங்கப்பட வேண்டும் என்பது புரிகிறது. எனவே எல்லா ஸயீஃப்களையும் ஒரே நேர்க்கோட்டில் வைப்பது சரியன்று.

ஓர் ஊரில் ஓர் அறிஞர் இருந்தார். நபிமொழிகளை அறிவிக்கும் அவ்வறிஞரின் வீடு ஒரு நாள் திடீரெனத் தீப்பற்றி எரிந்தது. அதுவரை அவர் அறிவித்து வந்த ஹதீஸ்கள் ஸஹீஹ் என்று ஏற்கப்பட்டன. தீ விபத்துக்குப்பின் அவர் அறிவித்த ஹதீஸ்கள் ஸயீஃப் எனக் கருதப்பட்டன.

அவர் நபிமொழிகளை எழுதிவைக்கும் பழக்கமுள்ளவர். தம் மாணவர்களுக்கு ஹதீஸ்களை அறிவிக்கும்போது மனப்பாடமாகவே அறிவிப்பார். எழுதியவைத்திருக்கும் ஏட்டைத் திறந்து பார்க்கமாட்டார். எனினும் அந்த ஏட்டைக் கைவசம் வைத்திருப்பார்.

அந்த ஏடு அவரின் நினைவாற்றலுக்கு ஒரு துணையாக இருந்திருக்கிறது. அவ்வளவுதான். வீடு தீப்பற்றுக்கு இம்கானதில் அந்த ஏடும் எரிந்துவிட்டது. விபத்துக்குமுன் ஹதீஸ்களை அறிவித்தபோது திட்டவட்டமான சொற்களையே பயன்படுத்தியிருந்தார். அதாவது 'நபி ஸல்லல்லாஹு அலைஹி வஸல்லம் கூறினார்கள்', 'நபி ஸல்லல்லாஹு அலைஹி வஸல்லம் செய்தார்கள்' என்ற சொற்களைப் பயன்படுத்திக் கொண்டிருந்தார்.

இப்படித் திட்டவட்டமான சொற்களைக் கூறுவதில் அவருக்குத் தயக்கமேதும் இருந்ததில்லை. தீ விபத்தில் ஏடு எரிந்தபின் அவர் ஹதீஸ்களை அறிவிக்கும் சொற்களை மாற்றிக்கொண்டார். 'நபி ஸல்லல்லாஹு அலைஹி வஸல்லம் இப்படித்தான் சொல்லியிருப்பார்கள்', 'இப்படித்தான் செய்திருப்பார்கள் என்றே பெரும்பாலும் நான் நினைக்கிறேன்' எனச் சொல்லத் தொடங்கினார்.

நபி ஸல்லல்லாஹு அலைஹி வஸல்லம் கூறிய வார்த்தைகளை மாற்றி வேறு சொற்களைப் பயன்படுத்தக் கூடாது என்ற கூருணர்ச்சி காரணமாக அவர் அவ்வாறு கூறியிருக்கிறார். இது அந்த அறிஞருடைய இறையச்சத்தின் வெளிப்பாடு.

ஏடு எரிந்துவிட்டதால் அதைத் திறந்து பார்த்து ஹதீஸின் நேரடிச் சொற்களை உறுதிப்படுத்திக் கொள்ளும் வாய்ப்பு இல்லாமல் போய்விட்டது. எனவே திட்டவட்டமான சொற்களை அவர் தவிர்த்துவிட்டார்.

திட்டவட்டமான சொற்களால் அறிவிக்கப்படாத நபிமொழிகள் ஸயீஃப் என்ற தரத்துக்கு இறங்கிவிடுகின்றன. எனவே ஒரே அறிவிப்பாளர் கூறும் ஹதீஸ்கள்கூட ஸஹீஹ், ஸயீஃப் என்ற இரு வகையான தரத்திலும் சேர்க்கப்பட்டுவிடுகின்றன. இது மட்டுமல்லாமல் ஓர் அறிவிப்பாளரின் அதிகமான கூருணர்ச்சியும் பேணுதலும்கூட அவர் அறிவிக்கும் ஹதீஸ்கள் பலவீனமாவதற்கரிய காரணமாகிவிடுவதுண்டு. இவ்வாறான ஹதீஸ்களை பலவீனமானவை என்று கூறி, ஒதுக்கிவிட முடியுமா என்ற கேள்வி அர்த்தமற்றது கிடையாது.

இஸ்லாம் உருவாகித்தந்த முதல் தலைமுறையாம் நபித்தோழர்களின் காலத்திலிருந்து சில செயல்கள் சட்ட அந்தஸ்தைப் பெற்று நடைமுறையில் இருந்து வருகின்றன. உதாரணமாக "இசை கேட்பதும் இசைப்பதும் கூடாது', "திருமணத்துக்கு இரண்டு சாட்சிகள் தேவை', 'திருமணங்களைப் பள்ளியவாசலில் நடத்த வேண்டும்' போன்ற நடைமுறைகள் இந்தச் சமுதாயத்திடம் தொடக்கக் காலத்திலிருந்தே நடைமுறையில் உள்ளன.

எனினும் இவை குறித்தான ஹதீஸ்கள் எல்லாமே பலவீனமானவை. அறிவிப்பாளர்கொடர் பலவீனமாக இருக்கிறது என்பதற்காக அந்த நடைமுறைகளின் சட்ட அந்தஸ்தைப் பறித்துவிட முடியுமா என்ற கேள்வியை என்ன செய்வது?!

இத்துறையின் வல்லுநரான பேரறிஞர் அல்ஹாஃபிழ் இப்னு ஹஜர் ரஹிமஹுல்லாஹ் அவர்கள் ‘ஹதீஸ்கள் பலவீனமாக இருக்கின்றன என்பதற்காக இந்த நடைமுறைகளின் சட்ட அந்தஸ்தைப் பறிக்க முடியாது’ என்கிறார்கள்.

இமாம் மாலிக் ரஹிமஹுல்லாஹ் அவர்கள் மதீனாவாசிகளில் பெரும்பாலோரின் (ஜும்ஹூர்) நடைமுறையில் இருக்கும் செயல்பாடுகளை (அதாவது ஷுஹ்ரஹி அமுலில் மதீனா) தம் சட்ட மூலாதாரங்களில் ஒன்றாக ஏற்றுக் கொண்டருந்ததை நாம் கவனிக்க வேண்டும்.

நாம் சொல்ல வருவது இதுதான். ‘ஸஹீஹ் என்றால் ஏற்கத்தக்கது, ளயீஃப் என்றால் புறக்கணிக்க வேண்டும்’ என்ற ஒரு தட்டையான, மேம்போக்கான புரிதல் சரியன்று.

மஜ்லிமுஸ் ஸுன்னத்தின் நபவிய்யா என்ற இந்த நூல் இஸ்லாமிய அறிவலகில் புகழ் மேவிய பதினான்கு நூல்களிலுள்ள 1,14,194 நபிமொழிகளுள் திரும்பத் திரும்பக் கூறப்பட்டிருக்கும் ஹதீஸ்களை ஒரே தடவை மட்டும் பதிவு செய்து அவற்றை 28,430 ஆகக் குறைத்து, பிறகு ஒத்த கருத்துள்ள அல்லது ஏறத்தாழ அதே கருத்துள்ள ஹதீஸ்களையும் நீக்கி 3,921 ஹதீஸ்களாகக் குறைத்து இந்நூலைத் தொகுத்துள்ளார் நூலாசிரியர் ஸாலிஹ் பின் அஹ்மத் அஷ்ஷாமீ அவர்கள்.

திரும்பத் திரும்பக் கூறலையும் ளயீஃபையும் தவிர்க்க வேண்டும் என்பதே இந்நூல் உருவான காரணம் என்பதை முன்னுரையில் தெளிவாக விவரிக்கிறார் நூலாசிரியர். எனினும் இந்நூலில் முப்பத்து மூன்று ளயீஃபான ஹதீஸ்கள் இடம்பெறுவதை அவரால் தவிர்க்க இயலவில்லை. இதுவே ளயீஃப்களில் ஏற்கத்தக்கவையும் உள்ளன என்பதற்கான சான்றாகும்.

முன்னுரையில் ‘நான் இமாம் அஹ்மது ரஹிமஹுல்லாஹ் அவர்களின் வழிமுறையைப் பின்பற்றிக் கூறியுள்ளேன்’ என்றும் ‘அதேநேரத்தில் முற்றிலும் ளயீஃப் தரத்திலான ஹதீஸை நான் எடுத்தாளவில்லை' என்றும் நூலாசிரியர் கூறியிருப்பது துறைசார்ந்த நிபுணத்துவம் பெற்ற முன்னோர்களின் வழியிலிருந்து அவர் விலகவில்லை என்பதைக் காட்டுகிறது.

நூலின் முன்னுரையை வாசகர்கள் ஒன்றுக்கு இரண்டு முறை வாசிக்க வேண்டுகிறேன். இது அவசர உலகம். எதையும் வழவழ என்றில்லாமல் சுருக்கமாகக் கேட்கும் உலகம். சமூக ஊடகங்களில்கூடச் குறுங்காணொலிகள்தாம் (ஷார்ட் வீடியோஸ்) விரும்பிப் பார்க்கப்படுகின்றன. எனவே மார்க்கத்தின் மூலாதார நூல்களும் இவ்வாறான வடிவத்தில் வர வேண்டும் என்று வெளியீட்டாளர்கள் விரும்பியிருக்கலாம். அந்த வகையில் இந்த முயற்சி ஏற்கத்தக்கதே.

இது ஒரு (ரெஃபரென்ஸ் புக்) குறிப்புகளைப் பார்க்கும் நூல், இதற்கு ஆய்வுரை எழுதுவதற்காக இந்நூலை முழுவதுமாகப் படித்துவிட முயன்றேன்; இயலவில்லை, ஓரளவுக்குப் படித்தேன். மொழிபெயர்ப்பும் கலைச்சொல் அகராதியும் சிறப்பாக இருக்கின்றன.

மூன்றுராசிரியர் அரும்பாடுபட்டு பெரும் முயற்சி செய்து இந்நூலை அறிவுலகத்துக்கும் ஆய்வுலகத்துக்கும் முன்வைத்திருக்கிறார். அவரின் கொடையைத் தமிழ் பேசும் மக்களுக்குத் தர முயற்சி செய்திருக்கும் வெளியீட்டாளர்களும் மொழிபெயர்ப்பாளரும் பாராட்டுக்குரியவர்கள்.

இவர்களின் சேவைகள் பேரன்பாளன் அல்லாஹ்விடம் அங்கீகாரம் பெற்றிட துஆ செய்கிறேன். நபிமொழிக்கான இவர்களின் சேவைகள் தொடரட்டும். அறிவு துலங்கட்டும்.